🎓 डॉ. ए. पी. जे. अब्दुल कलाम विद्यार्थी फाउंडेशनचा शैक्षणिक वर्ष 2024-25 दहावीचा निकाल 100%🌹

ना कुणाशी स्पर्धा , ना कुणाचा द्वेष , 

ना कुणाच्या पुढे जाण्याची आकांक्षा, 

ना कुणाला कमी लेखण्याची गुर्मी ,

फक्त विद्यार्थी घडवण्याची जिद्द... ! 

शैक्षणिक संघर्षातून यशाकडे…

शैक्षणिक आणि सामाजिक विकासापासून वंचित राहिलेल्या गोरगरीब, श्रमिक, आणि कष्टकरी समाजातील अनेक मुलं... विषम परिस्थितीशी दोन हात करत, नववीपर्यंत कोणत्याही क्लासला न जाता, दहावीत आल्यावरच ‘शिक्षणाचं भान’ घेऊन शिकू लागतात. ही केवळ त्यांची धडपड नाही, तर त्यामागे असतो समाजात खोलवर रुजलेला एक विचार — "दहावी नंतरच शिक्षणाचं महत्त्व कळतं."

या मानसिकतेमुळे पालक आणि विद्यार्थी शालेय शिक्षणात सुरुवातीपासूनच फारसा रस घेत नाहीत. आठवी-नववीत मूल शैक्षणिकदृष्ट्या घसरतं, आणि तेव्हा लक्षात येतं की आपण वेळ गमावली आहे. त्यामुळेच अनेक पालक थेट दहावीत आपल्या मुलांना शिकवण्यासाठी घेऊन येतात — शिक्षणाच्या मुख्य प्रवाहात उडी घेण्यासाठी!

पण अशा विद्यार्थ्यांकडे असतो — अभ्यासाच्या मूलभूत संकल्पनांचा अभाव, आत्मविश्वासाची कमतरता, आणि शिक्षणाबद्दलचा अनभिज्ञ दृष्टिकोन. 

‘डॉ. ए. पी. जे. अब्दुल कलाम विद्यार्थी फाउंडेशन’ या आमच्या शैक्षणिक कुटुंबाचा उद्देश हाच — या विद्यार्थ्यांना योग्य मार्गदर्शन देणं, त्यांची वैयक्तिक आणि शैक्षणिक वाटचाल घडवणं, त्यांना अक्षर ओळखीपासून विज्ञान आणि गणिताच्या संकल्पनांपर्यंत सक्षम करणं.

वर्षभर आमचा हा प्रवास त्यांच्या बरोबर असतो — कधी शिक्षकासारखा कठोर, तर कधी मित्रासारखा समजूतदार. त्यांचा व्यक्तिमत्त्व विकास, अभ्यासात रुची निर्माण करणं, स्पर्धेत स्वतःला सिद्ध करण्याची उमेद, आणि परीक्षेपर्यंतचा संपूर्ण प्रवास — हा सगळा अनुभव आमच्यासाठीही प्रेरणादायी ठरतो.

मात्र या यशामागे खरी स्पर्धा असते विद्यार्थ्यांची स्वतःशीच.!

स्वतःवर मात करणं, स्वतःला ओळखणं आणि स्वतःचं भविष्य स्वतः घडवणं — हीच त्यांची खरी परीक्षा असते.

डॉ. ए. पी. जे. अब्दुल कलाम विद्यार्थी फाउंडेशन हे शैक्षणिक कुटुंब या विद्यार्थ्यांच्या यशाचा फक्त एक निमित्तमात्र भाग आहे. पण या निमित्ताने आम्हाला त्यांच्यासाठी काही करू दिलं, हीच आमच्यासाठी खऱ्या अर्थाने प्रेरणा आहे.

विद्यार्थ्यांच्या ह्या यशस्वी वाटचालीसाठी सर्व पालक, शिक्षक आणि स्वयंसेवक यांचे मन:पूर्वक आभार..!

आणि आपल्या लढवय्या विद्यार्थ्यांना — पुढील आयुष्याच्या प्रवासासाठी लाखो शुभेच्छा आणि प्रेमळ सदिच्छा.. 🌹

🙏🏻 आपलाच विनम्र स्नेहाकिंत आणि शुभेच्छुक:-

#विद्यार्थीमित्र प्रा.रफीक शेख..

🎓 डॉ. ए.पी.जे.अब्दुल कलाम विद्यार्थी फाउंडेशन, परभणी.