स्नेही पालक, आदरणीय शिक्षकगण आणि प्रिय विद्यार्थी मित्रांनो,

आपल्या प्रेमळ सहकार्याबद्दल, निखळ विश्वासाबद्दल आणि सातत्यपूर्ण पाठिंब्याबद्दल डॉ. ए. पी. जे. अब्दुल कलाम विद्यार्थी फाउंडेशन हा शैक्षणिक व सामाजिक परिवार आपणा सर्वांसमोर कृतज्ञतेने नतमस्तक आहे. आपण दिलेल्या विश्वासाच्या प्रकाशामुळेच आमच्या प्रयत्नांना दिशा, वेग आणि अर्थ प्राप्त होतो.

शिक्षण ही केवळ गुणपत्रिकेतील आकड्यांची शर्यत नसून ती विचारांची परिपक्वता, मूल्यांची जपणूक आणि व्यक्तिमत्त्वाच्या घडणीची अखंड प्रक्रिया आहे. या प्रवासात आपण सर्वांनी एकत्रितपणे जो विश्वासाचा पूल उभारला, तोच आपल्या विद्यार्थ्यांच्या उज्ज्वल भविष्याचा भक्कम पाया ठरत आहे.

प्रिय विद्यार्थी मित्रांनो,

तुमच्या जिद्दीने, चिकाटीने आणि अथक परिश्रमांनी तुम्ही केवळ अभ्यासक्रम पूर्ण केला नाही, तर आत्मविश्वास, शिस्त आणि ध्येयवेडेपणाची नवी ओळख निर्माण केली आहे. तुमच्या प्रत्येक प्रयत्नामागे तुमचे स्वप्न, तुमची धडपड आणि तुमचा आत्मविश्वास दडलेला आहे. हीच तुमची खरी संपत्ती आहे.

लक्षात ठेवा, 

स्व-ओळख ही दिशा देते,

स्व-शिस्त ही वाट दाखवते,

आणि सातत्यपूर्ण प्रयत्न हे यशाचे द्वार उघडतात.

कठीण प्रसंग हे अडथळे नसतात, तर ते आपल्या सामर्थ्याची परीक्षा घेणारे टप्पे असतात. जो या टप्प्यांवर खंबीरपणे उभा राहतो, तोच आयुष्याच्या रणांगणात विजयी ठरतो. म्हणूनच अपयशाला घाबरू नका; त्यातून शिकून पुन्हा उभे राहण्याची जिद्द जपा.

आपल्या आयुष्यातील ही दहावीची पायरी म्हणजे केवळ एक टप्पा आहे; खरा प्रवास तर यानंतर सुरू होणार आहे. ज्ञान, विवेक, विज्ञान आणि मानवतेच्या मूल्यांनी सजलेला हा प्रवास तुम्हाला केवळ यशस्वीच नाही, तर अर्थपूर्ण आयुष्य जगायला शिकवेल.

विद्यार्थी मित्रांनो, येणारा काळ तुमचाच आहे..!

तुमच्या स्वप्नांची बीजे आजच पेरा, त्यांना कष्टांची आणि सातत्याची पाणी द्या, आणि आत्मविश्वासाच्या सूर्यप्रकाशात त्यांना फुलू द्या.

तुमच्या कर्तृत्वाने आकाशालाही मर्यादा भासावी, तुमच्या ध्येयाला उंच भरारीची पंख लाभावी,आणि तुमच्या यशस्वी वाटचालीला सतत प्रेरणेची, सकारात्मकतेची आणि मूल्यांची साथ लाभो हीच मनःपूर्वक शुभेच्छा..!

आपल्या या प्रवासात आमचे मार्गदर्शन, संस्कार आणि आशीर्वाद सदैव तुमच्यासोबत राहतील, ही खात्री बाळगा.

आपणा सर्वांचे मनःपूर्वक आभार..!

कार्यक्रमाचे फोटो पाहण्यासाठी कृपया खालील लिंकला भेट द्या:

https://drive.google.com/drive/folders/1wb282sabJDr-usFwTE4MNXQwpItNUFUD?usp=drive_link

आपला स्नेही आणि आभारी,

#विद्यार्थीमित्र प्रा. रफीक शेख

डॉ. ए. पी. जे. अब्दुल कलाम विद्यार्थी फाउंडेशन, परभणी.